Türkiyənin turizm cənnəti Antalyadan Reportaj – Gazeteci Ülker Piriyeva

Ülker Piriyeva – AZERBAYCAN

“Go Türkiye” proqramı çərçivəsində Türkiyənin turizm imkanları tanıdılır.

1453 Kral Media xəbər agentliyi xəbər verir ki, Türkiyə Mədəniyyət və Turizm nazirliyinin proqramı çərçivəsində Türkiyənin turizm potensialının tanıdılması məqsədilə “Go Turkiye” Turizm Bürosu dünyanın altı ölkəsindən olan nüfuzlu media şirkətlərinin nümayəndələri İstanbulda görüşərək, ilk səfərlərini Antalyadan başlayıblar.

Belə ki, proqramda Azərbaycan, Özbəkistan Qazaxıstan, Serbiya, Macarıstan və Rumıniya olmaqla altı ölkədən olan beynəlxalq jurnalistlər və eyni zamanda bloqqerlər iştirak edir. Azərbaycanı xəbər saytı olaraq Azadmedia.az və saytın Redaktoru, Türkiyə 1453 Kral Media xəbər agentliyinin Azərbaycan rəhbəri, jurnalist Ülkər Piriyeva təmsil edir.

Dənizin, günəşin, təbiətin və tarixin bir araya gəldiyi sehirli şəhər – ANTALYA.

Türkiyənin turizm cənnəti olan Antalyanın hər səmti başlı başına bir təbiət möcüzəsidir. Antalya Türkiyənin ən əhəmiyyətli turizm mərkəzlərindən biridir.

Antalyanın qədim adı Pamfiliya idi və burada salınan şəhərlər xüsusilə II və III əsr öz qızıl dövrünü yaşayıb. 5-ci əsrə doğru əvvəlki şöhrətini itirib. Bölgə Şərqi Roma və ya Türkiyədə bilindiyi kimi Bizanslıların hakimiyyəti altında ikən 1207-ci ildə Səlcuqlular tərəfindən türk torpaqlarına birləşdirilib.

Bəli, zamanla Ataliya, Adalya deyənlər oldu, sonda isə Antalya adı ilə tarixdə öz yerini tapdı. Arxeoloji qazıntılarda 40 min il əvvəl Antalya və ətraf ərazilərdə insanların yaşadığı sübuta yetirilib.

Antalya vilayətinin rayonları – Akseki, Alanya, Elmalı, Finike, Qazipaşa, Gündoğmuş, İbradı, Demre, Kaş, Kemer, Korkuteli, Kumluca, Manavgat, Serik, Muratpaşa, Konyaaltı, Aksu, Döşemealtı, Kəpəzdir.

Türkiyənin turizm möcüsəsi olan Antalya şəhəri Aralıq dənizi sahili boyunca uzanan kilometrlərlə sahil xətti, qədim şəhərləri, təbii gözəllikləri, muzeyləri və gözəl mənzərələri ilə yerli və xarici turistlərin ən sevimli məkanıdır. Xüsusilə yay fəslində yerli və xarici turistlərlə dolu olan Antalyanın tarixi yerləri zəngin tarixi ilə tanınan Anadolu torpaqlarının aynasıdır.

Tarixdə bir çox fərqli sivilizasiyaya ev sahibliyi etmiş olan Antalya geniş bir mədəniyyət spektrinə malikdir. Şəhər həm də daxili və xarici köçlərə görə çoxmillətli şəhər olma xüsusiyyətinə malikdir. Tarixdə Likiyalıların, Lidiyalıların, Pamfiliyalıların, Perqamonların, Romalıların, Bizanslıların, Səlcuqlu, Osmanlıların və nəhayət, Türkiyə Cümhuriyyətinin hakimiyyəti altında olan Antalya bu sivilizasiyaların heç birində paytaxt olmayıb.

Antalyanın yerləşdiyi mənzərəli sahil zonası qeyri-rəsmi olaraq “Türk Rivierası” adlanır. 24 saat canlı atmosferə malik olan Antalya dörd milli parka ev sahibliyi edir – Olimpos Bəy Dağları Sahil Milli Parkı, Güllük Dağı,

Termessos Milli Parkı, Köprülü Kanyon Milli Parkı, Altınbeşik Mağarası Milli Parkı. Milli parkları, zəngin tarixi abidələri və möhtəşəm marinası ilə Aralıq dənizinin göz bəbəyi olan Antalya, rayonları və tətil mərkəzləri ilə Türkiyə turizminin ən əhəmiyyətli şəhəri olmaqla bərabər, həmçinin sürətlə böyüyən və xaricə yönəlmiş sosial-mədəni quruluşu ilə insanları çox fərqli üfüqlərə cəlb edə bilən bir vilayətdir.

Hazırda, 400-dən çox 5 ulduzlu oteli olan Antalya, əksər ölkələrdəki otel sayından daha çox otelə malikdir. İldə 10 milyondan çox turisti özünə cəlb edən Antalyada dünyanın müxtəlif ölkələrindən olan çox fərqli mədəniyyətlərə malik 50 minə yaxın əcnəbi yaşamaqdadır. Türkiyə turizminin flaqmanı olan şəhər dünya turizmində ilk ağla gələn adlardan biridir.

Roma, Səlcuqlu və Osmanlı kimi bir çox sivilizasiyanın mirasını özündə ehtiva edən bu füsunkar şəhər müasir dünyanın turistik cazibə mərkəzi olmağa davam edir.

Əzəl gündən tarixi binalar arasında gəzməyi çox sevirəm. Belə olan halda, şəhərin mürəkkəb və izdihamlı vəziyyəti ilə daha yaxından tanış olursan və bu sənə heç də çətin gəlmir. Turizm mərkəzi Antalyanın cazibədar təbiəti ilə yanaşı, Kaleiçi də bu hissləri yaşadan qədim məkanlardan biridir. Qədim şəhər səmti olaraq da bilinən Antalya Kaleiçi mütləq buraya gəldiyinizdə görüb gəzməniz gərəkən yerlər arasında olmalıdır. Ancaq tövsüyyəm odur ki, mütləq bir gününüzü burada keçirib dolu-dolu zövq alasınız. Kaleiçinin küçələrini gəzin, dənizi və gün batımını seyr edin. Axşam balıq restoranlarının birində xoş və rəngarəng təamlardan dadın.

Özünəməxsus memarlıq üslubları ilə Kaleiçi evləri isti yay aylarında sərin, soyuq qış aylarında isə isti saxlamaq üçün nəzərdə tutulub. Evlərin tikintisində istifadə olunan bağ şüası evlərin zəlzələyə davamlı olmasına kömək edir. Kaleiçi evləri memarlıq orijinallığı və tarix qoxuyan quruluşu ilə həm yerli sakinləri, həm də turistləri eyni səviyyədə valeh etməyə davam edir.

Burada sadəcə küçələrdə gəzmək belə zövq verir. Tarixi divarlar arasında dolaşmağı sevən birisinizsə, Kaleiçi tam olaraq sizin üçündür. Gəzdikcə Osmanlı, Bizans və Səlcuqluların izlərini hər addımda görə bilərsiniz. Qədimi küçələr başdan-başa meyxanalar, restoranlar, otellər, antikvar və suvenir mağazaları ilə doludur.

Maraqlı təqdimatı ilə maraş dondurması, istidə sərinlik gətirən çeşidli buzlu limonadlar, dənizin sərin mehi və s…

Təbiiki gəzdikcə bütün bunlar bitmir. Əgər labirint kimi olan küçələrdə qeybolsanız, qətiyyən qorxmayın, həyat da belə deyildirmi? Hər yeni yol və hər yeni addım özlüyündə insana yeni sərgüzəştlər gətirir. Odur ki, əsla qorxmayın..

Belə ki, Kaleiçi təsəvvür etdiyinizdən də daha böyük bir yerdir, lakin yerli və xarici turistlər üçün başlanğıc nöqtəsi adətən Hadrian Qapısı olur. Roma İmparatorunun şərəfinə tam 1870 illik Hadrian qapısı.. Buradan gəzintiyə başlayırlar və dənizə tərəf yol alırlar. Siz də bu yolu izləyə bilərsiniz. Hətda yenidən Hadrian tərəfinə qayıtmaq istəyirsinizsə, Kaleiçi Liftindən pulsuz istifadə edə bilərsiniz. Doğrudur, mən istifadə etmədim, lakin gəzi rəhbərimiz Mustafa bəyin verdiyi məlumat belə idi..

Bütün bunlarla da bitmir. Monumental qəbiristanlıq məqsədi ilə tikilmiş Hıdırlıq qalası Roma dövründən bəri toxunulmaz olaraq qalmağı bacarmışdır. Həm də müdafiə qülləsi, mayak və gözətçi qülləsi kimi istifadə edilmişdir. Yerli sakinlərdən duyduğuma görə, bu gün xüsusi tədbirlər üçün istifadə olunur.

Gəlin biraz da mövsümi yeməklərdən danışaq. Məsələn, balıqları digər ətini istehlak etdiyimiz canlılardan fərqləndirən ən fərqli xüsusiyyət mövsümi istehlak təqviminin olmasıdır. Aparılan araşdırmalar baxıldığında, balıqların düzgün ay və mövsümə uyğun istehlakının sağlamlıq baxımından normaldan daha faydalı və təsirli olduğu, iqlimin balıqlarda vitamin-mineral fərqi yaratdığı müşahidə edilmişdir. Xüsusilə, Antalya balıq restoranlarında balıq vitrinlərində mövsümi balıq növləri dəyişdirilir. Ancaq biz iyul ayında “Go Turkiye” proqramı ilə Antalyaya getdiyimiz üçün iyul ayının iki balıq növünün adlarını sizə çəkəcəyəm. Deməli, Sardina və skumbriya iyul ayının iki şanslı balığıdır. İyul ayı bu iki balığın dadının adi aylarla müqayisədə ən yüksək olduğu aydır. Məlum olduğu kimi, ətin yağlılığı nə qədər yüksək olarsa, onun dadı bir o qədər yaxşı olar. Sardinya və skumbriyanın ən yağlı dövrü olan iyul ayında ən üst səviyyədə balıqdan ləzzət ala bilərsiniz.

Antalyanın simvolu sayılan Yivli Minare Məscidi və Külliyesini demək olar ki, hər yerdən görmək olar. O, həm də ilk Səlcuqlu və İslam əsərlərindən sayılır. Cümhuriyyət meydanına gəldiyiniz zaman görə biləcəyiniz bu tikilinin Bizans kilsəsi üzərində inşa edildiyi və Əlaəddin Keykubat dövründə məscidə çevrildiyi təxmin edilir. Həmçinin altı günbəzi var.

Əgər, Antalyada Kaleiçinin necə bir yer olduğunu və getməyə dəyər olub olmadığını bilmək istəyirsinizsə, deyə bilərəm ki, mütləq görməli olduğunuz bənzərsiz bir mədəniyyət bölgəsidir. Muzeyləri, saat qülləsi, küçələri, çimərliyi, marina və daha bir çox nadir gəziləsi yerləri ilə gözəlliyinə heyran qalacağınız Kaleiçi bu yay mütləq tətil seçiminizdə olması lazım olan bənzərsiz bir yerdir.

Türkiyə, Antalya vilayətindən sevgi ilə qalın..

18 Temmuz, 2023/ Ülker Piriyeva

Ülker Piriyeva – Azerbaycan

Türkiyə Cumhuriyyəti Mədəniyyət və Turizm nazirliyinin dəvəti ilə “Go Turkiye” proqramı çərçivəsində Türkiyənin turizm potensialının tanıdılması məqsədilə dünyanın beş ölkəsindən olan nüfuzlu media şirkətlərinin nümayəndələri İstanbulda görüşdü. “Go Türkiye” proqramında Azərbaycanı təmsil edən jurnalistlərdən biri də 1453 Kral Media-nın Azərbaycan təmsilçisi, Azadmedia.az-ın redaktoru Ülkər Piriyeva oldu.

Nəzərinizə çatdırım ki, “Go Turkiye” turu çərçivəsində bizlər İstanbul, Eskişehir, Afyon və Kütahya şəhərlərinin turizm potensialının tanıdılması nəzərdə tutulmuşdu. Dünyanın beş ölkəsindən olan Jurnalistlər İstanbul daxil olmaqla, Eskişehirdə – Sivrihisar Ulu Camii, Odunpazarı və muzeylər, Afyonda – Ulu Camii və Mevlihane, UNESCO listesinde olan Ulu Camii, GastroAfyon – Gastronomiya festivalı, Kütahyada – Zeus tapınağı – Teatr və Muzey, Kütahya Arxeologiya muzeyi, Ulu Camii, Kütahya Mədəniyyət və İncəsənət evi və başqa yerləri ziyarət etdik.

Bəli, Türkiyə Cumhuriyyəti hər il sizləri və bizləri milyonlarla ulduzun altında təbiətin qoynunda unudulmaz səyahətə dəvət edir.

Türkiyənin Qlobal Turizm Tanıtım Platforması olan GoTurkiye.com Türkiyə haqqında məlumat almaq və səyahətlərini planlaşdırmaq istəyən dünyanın dörd bir guşəsindən olan bütün turistlərə ölkənin mədəniyyət və turizm dəyərlərini bir dam altında təqdim edir.

Belə ki, Türkiyə Cumhuriyyəti Mədəniyyət və Turizm Nazirliyi və Türkiyə Turizm Tanıtma və İnkişaf Agentliyi – TGA tərəfindən ən son texnologiya və müasir dizayn tendensiyalarına uyğun olaraq hazırlanan bu platforma ilə yüksək səviyyəli istifadəçi təcrübəsi hədəflənib ki, bunun vasitəsilə də istifadəçilər Türkiyə ilə bağlı əhatəli məzmundan daha çox faydalanmaqdadırlar.

Bəli rəngarəng təamları və xüsusən terman suları ilə Türkiyənin gözdə vilayətlərindən biri olan Afyonda bizləri – Ulu Camii və Mevlihane, UNESCO siyahısında olan Ulu Camii, soyuq payız günlərində isti təamları ilə Gastronomiya festivalı olan – GastroAfyon qarşıladı və daha ayrı-ayrı gəzə bilmədiyimiz, görməyə belə vaxtımızın yetmədiyi yerlər..

“Go Turkiye” ilə Türkiyənin Termal Paytaxtı olan Afyonda ziyarət ediləcək yerlərin sehrini anlatmaq mümkün deyil, gərək canlı-canlı, qarış-qarış gəzib görəsiniz. Lakin anlada bildiyim qədərini sizlərlə bölüşə bilərəm.

Bəli, dəyərli oxuyucularımız və izləyicilərimiz! Afyon həm gəzməli yerləri, həm də yerli ləzzətləri baxımından qonaqlarını sevindirməyi bacarır. Fikrimcə, Afyona getməzdən əvvəl bu məlumatları bilsəniz, bu şəhəri daha yaxşı tanıyacaq və daha rahat gəzə biləcəksiniz.

İlk növbədə onu qeyd edim ki, tarixi məkanların həvəskarları üçün bir cənnət məkan olan Afyon və ətrafı minlərlə il ərzində bir çox sivilizasiyaya ev sahibliyi etmiş təsirli qədim şəhərlərlə əhatə olunub.

Afyonkarahisar (xalq arasında Afyon kimi tanınır) Qərbi Anadolu ilə İç Anadolu Bölgələrini birləşdirən yüksək bir ərazinin cənub hissəsini təşkil edən bir vilayətdir. Afyon vilayətinin şimaldakı qonşuları – Eskişehir və Kütahyadır. Türkiyənin “Termal Paytaxtı”, eyni zamanda mərmər və qida sektorunda xaricdə ad çıxarmış brend şəhərlərdən biridir, bu şəhər. Afyon şəhəri tarix boyunca əhəmiyyətli bir mərkəz olub. Qeyd edim ki, miladdan öncə başlayan macərasında Hitlər, Friqiyalılar və Roma İmperatorluğu sərhədləri daxilində olmuş və sonradan Süleyman şahın fəthi ilə ilk dəfə “Türk” hakimiyyəti altına keçmişdir.

Afyonda görməli, gəzməli yerlər çoxdur. Öncəliklə, onu vurğulayım ki, Afyon təbii yeraltı sərvətləri ilə məşhur bir şəhərdir. Afyonkarahisar rəsmi olaraq Ege bölgəsində yerləşir. Amma Egenin ən İç Anadolusunda yerləşir desək heç də yalan olmaz. Türkiyənin 4 istiqamətli dəmir yolu xətti olan yeganə əyalətidir. Türkiyədəki dəmiryollarının mövcud olduğu yeddi bölgəsindən biridir. Termal əyalət olduğundan turizm kaplıcaları-bulaqları-spaları ilə məşhurdur. Bunlar arasında Afyonkarahisarda Bolvadin Heybeli Spa, Qazlıgöl Spa, Sandıklı Hüdai Termal Turizm Mərkəzi, Ömer Gecek ve başqa Spalar var. Fərqli konseptə malik Afyon otelləri arasından ən uyğununu özünüzə seçərək tətil planınızı qurmağa başlaya bilərsiniz.

Başdan ayağa tarix qoxuyan bu vilayət əmin olun ki, Türkiyənin turizm cənnətlərindən biridir. Təkcə termal bulaqları deyil, həm də pəri bacalarından, Frigiya vadilərindən, Ayazini kəndindən, Afyonkarahisar qalasından və Bedesten bazarından tut hər qarışı sözün əsl mənasında tarix və mədəniyyətdir. Afyon Karahisar qalası olaraq da bilinən, Ana ilahə Kıbeleyə həsr olunmuş ibadət yerləri var. Afyonkarahisarın simvollarından biri olan qalaya qalxdığınız zaman şəhərin mənzərəsini seyr edə bilərsiniz. Əslində, Afyonu gəzərkən tez-tez Mövlananı xatırladan əsərlərə rast gələ bilərsiniz. Həmçinin Mövlana deyildikdə ağla ilk gələn Konya şəhəri olsa da, Mövlana Afyon üçün də əhəmiyyətli bir məqamdır. 40 taxta sütun üzərində yüksələn Afyon Ulu Məscidinin üç qapısı və kərpic minarəsi olan Ulu Cami 900 illik Səlcuqlu əsəridir. İçindəki 40 taxta sütun ilə də sizlərə heyrətlənməyə əsas verir. Tarixi XV əsrə aid olan Qübbəli Cami günbəzli quruluşu ilə də insanları ovsunlamağı bacarır. Qaya içinə oyulmuş Ayazini Qaya Kilsəsi Afyonun İhsaniyyə rayonunda yerləşir. Ayazini kəndi və ya Ayazini Metropolisi, təbii və tarixi zənginliyi ilə Afyonda diqqət çəkən bir nöqtədir. Bu yer Frigiya dövründən bəri yaşayış məntəqəsidir. Afyonda ziyarət ediləcək ən gözəl yerlərdən biridir. Burada təkcə Frigiyalılar deyil, Bizanslılar da yaşamışlar. Bundan əlavə, Afyonda 40-a yaxın kurqan və 20 qədim şəhər var və buradan əldə edilən əsərlər Afyon Arxeologiya Muzeyində sərgilənir.

Bəli, qardaş Türkiyənin termal paytaxtıdır, Afyon. Ən yüksək termal yataq tutumu olan əyalətdir. Hətda Türkiyədə adambaşına düşən beş ulduzlu otellərin ən çox olduğu əyalət Afyondur. Bundan başqa, dünyanın ən keyfiyyətli ağ mərməri İscehisar rayonunda istehsal olunur. Həmçinin Kızılay Mineral Suyu – İhsaniye rayonunda çıxmaqdadır. Dünyanın ən yaxşı mineral suyudur, bugünə qədər bir sıra beynəlxalq mükafatlara layiq görülüb.

Yaxşı, əgər, Afyona gediriksə, bu şəhər nələri ilə məşhurdur?

Afyon kolbasaları, sosisləri, Afyon qaymağı və Afyon lokumu bu şəhərin olmazsa olmazlarıdır. Bura kolbasa, qaymaq və lokumun paytaxtıdır. Ən yaxşı qaymaq camış südündən alınır. Afyon lokumu hər zövqə uyğun növlərdə istehsal olunur. Xüsusilə qaymaqlı lokumu son dərəcə məşhurdur. Çörək kadayıfı – Afyonda bir desert növüdür, ölkənin hər yerində sevilən və yeyilən bir desert növüdür. Xüsusilə süd qaymağı ilə yeməyə üstünlük verilir. Çörək-ekmek kadayıf sortlarına albalılı, qozlu kimi bir çox çeşidi daxildir. Afyonda sosisin-40 dan çox çeşidi, 4-5 milli brendi var, həmçinin.

Afyon həqiqətən tarix boyu mədəniyyətlərin beşiyi olmuş bir şəhərdir. Bunun təsirlərini XXI əsrdə asanlıqla görə bilərsiniz.. Həm təbii gözəllikləri ön plandadır, həm tarixi çox zəngindir, həm də bura Mövlana şəhəridir.

Gəlin, bu saydıqlarımızla bərabər, Gastro Afyon Beynəlxalq Turizm və Ləzzət Festivalından bəhs edək.

Gastro Afyon festivalı – Afyonun mərkəzində və mərkəzə bağlı kəndlərdə təşkil edilən, yerli məhsulları dünyaya tanıtmaq və termal turizmi dəstəkləmək məqsədi daşıyan bu gözəl festivalda siz şəhərin ən məşhur yeməklərini dada bilərsiniz. Eləcə də bu festival boyunca unudulmuş yerli ləzzətlər, konsertlər, xalq rəqsləri və turistik ekskursiyalarla xoş vaxt keçirə bilərsiniz.

Türkiyənin və dünyanın ən orijinal mətbəxlərindən biri olan, Qastronomiya sahəsində YUNESKO-nun Yaradıcı Şəhərlər Şəbəkəsində yer alan, Afyon mətbəxini, turizmini və mədəniyyətini tanıtmaq məqsədilə təşkil edilən IV. Beynəlxalq GastroAfyon Ləzzət və Turizm Festivalının qonağı olduq – biz də 1453 Kral Media-nın Azərbaycan təmsilçisi, Azadmedia.az-ın redaktoru olaraq iştirak etdik.

Beləliklə, bu il dördüncüsü gerçəkləşdirilən Beynəlxalq GastroAfyon Gastronomiya Festivalı hər il sıx bir iştirakla sektor üçün əhəmiyyətli qazancların əldə edildiyi Qastronomiya Şəhəri Afyonda keçirildi.

Belə ki, TÜRSAB Afyonkarahisar Bölgə Nümayəndəliyinin dəstəyi, Afyonkarahisar Bələdiyyəsi, Afyonkarahisar Valiliyi və Afyonkarahisar Peşəkar Aşpazlar Dərnəyinin əməkdaşlığı ilə keçirilən festivalda Afyonun qastronomik zənginliyi dünyanın dörd bir yanından gələn turistlərə tanıdılırdı.

Mövləvi mətbəxi başda olmaqla bütün yerli ləzzətlər və coğrafi göstəricilərə malik məhsullar təbliğ edilirdi.

Yerli və beynəlxalq media nümayəndələrinin, eləcə də yerli və xarici aşpazların, qastronomiya mütəxəssislərinin və məşhur qurmanların qatıldığı festivalda Afyon bütün aspektləri ilə izah edilirdi, iştirakçılara tam dad ziyafəti təqdim edilirdi. Elmi araşdırmalarla yadda qalan festivalda yemək yarışmaları, bir sıra əl işləri, konsertlər, rekord təcrübələr və bir çox sürpriz tədbirlər keçirilirdi. Qeyd edim ki, Festivalda iştirak pulsuz təşkil olunmuşdu.

Afyon Valisi Kübra Güran Yiğitbaşı xanım və Afyonkarahisar Bələdiyə başqanı Mehmet Zeybek 1453 Kral Media və Azadmedia.az-a özəl olaraq reportaj verdilər.

Afyon Valisi Kübra Güran Yiğitbaşı açıqlamasında – “Azərbaycan Cümhuriyyəti Silahlı Qüvvələrinin 44 günə əldə etdiyi möhtəşəm Zəfər dünyanın hərb tarixinə əbədi olaraq yazıldı. Azərbaycanın mədəniyyət paytaxtı olan qədim qala şəhər Şuşada aparılan ağlasığmaz döyüş əməliyyatları qüdrətli dövlətlərə örnək oldu. Bilirik ki, işğal nəticəsində Şuşadakı bir sıra tarixi-mədəniyyət abidələri düşmən tərəfindən talan olunub və məhv edilib. İnşaallah bərpa olunacaq. Həmçinin bilirik ki, Azərbaycanın mineral sularının ümumi geoloji ehtiyatlarının hardasa 39%-i işğaldan azad olunmuş rayonların payına düşür. Afyon kimi Qarabağda Kəlbəcərin xeyli dərəcədə termal suları var. Hətda Afyon və Kəlbəcərin termal sular üzrə qardaşlaşmış şəhər statuslarına nail ola bilərik.” – Deyə fikirlərini bildirib.

Afyonkarahisar Bələdiyə başqanı Mehmet Zeybek özəl açıqlamasında – “Qardaş Azərbaycan Cümhuriyyətinin həm savaş meydanında, həm masada II Qarabağ savaşında zəfər çalması tarixi əhəmiyyət kəsb edir. Azərbaycana qarşı qərəzli mövqe tutan bəzi dünya dövlətləri Azərbaycanın hansı gücə malik olmasını bir daha görmüş oldu. Qüdrətli Azərbaycan ordusu cənab Prezident İlham Əliyevin rəhbərliyi ilə altında dəmir yumruq gücünə əzəli torpaqlarını – Qarabağı mənfur erməni işğalından azad etdi. Vətən uğrunda şəhidlik zirvəsinə ucalanlar da oldu, qazi adını alanlar da. Allah şəhid olan qardaşlarımıza rəhmət eləsin, qazilərimizə şəfa versin. Türkiyə Cümhuriyyəti hər zaman qardaş Azərbaycanın yanındadır. Eyni zamanda, hər birinizi şəhərimizə dəvət edirik, Afyona hər zaman gözləyirik.” – Deyə qeyd edib.

Qeyd: Türkiyə Cumhuriyyəti Mədəniyyət və Turizm naziri Mehmet Nuri Ersoy, Afyon Valisi Kübra Güran Yiğitbaşı xanım, Vali Yardımcısı Uğur Kolsuz, Afyonkarahisar Bələdiyə başqanı Mehmet Zeybek, Afyonkarahisar İl Mədəniyyət və Turizm Müdiri Mehmet Tanır, Cemil Kaynak, Üyümez Mevlut, “Go Turkiye” rəhbərliyinə – media əlaqələr şöbəsi Tarık Erenə, Kamran bəyə, Tur rəhbəri Seçkin Ercana sonsuz təşəkkürlərimlə..

Gazeteci ve Siyaset bilimci Ülker Piriyeva
Türkiye/Afyonkarahisar

Türkiye 1453 Kral Media-nın Azərbaycan təmsilçisi, Azadmedia.az-ın redaktoru

Ülker Piriyeva – Azerbaycan

Qardaş Türkiyənin İç Anadolu bölgəsində yerləşən gözəl şəhər Eskişəhər..

Məncə, Eskişəhər anladılmaz, mütləq qarış-qarış gəzilməli və yaşanmalıdır.

Adına inad, günbəgün gözəlləşən və modernləşən şəhər – Eskişəhər..

Türkiyədə zamanın ürəyinin başqa cür bir həyəcanla döyündüyü bir şəhərdir, Eskişəhər..

1453 Kral Media Azərbaycan təmsilçisi Ülkər Piriyeva – “Bu gün Eskişəhər dünyanın ən inkişaf etmiş şəhərləri sırasındadır. Eskişəhər haradadır sualına cavab olaraq – “Türk Dünyasının Mədəniyyət Paytaxtı və YUNESKO-nun Mədəni İrs siyahısına daxil edilmiş olaraq İç Anadolu Bölgəsinin mədəni keçmişini göstərən dərin bir şəhər”dir. Həm də bu sayədə vurğunu olacağınız gözəlliyi ilə şəhər sizlərə unudulmaz tətil təcrübəsi yaşadacaq.”

Adı ilə belə məşhur olan Eskişəhər daha nəyi və ya nələri ilə məşhurdur?

Beləliklə ilklər, münbit hövzələr, yeraltı sərvətlərlə dolu dağlar və zəngin mədəniyyətinin sayəsində Eskişəhərin nə ilə məşhur olduğu sualına çoxlu cavablar verilir. Məhz, Türkmən dağının ətəyindən çıxarılan və şəhərin məşhur dəyərləri arasında ən çox adı çəkilən Kalabak suyu Türkiyədə içməli sular siyahısında 3-cü yeri tutur. Təbii ki, təqdim etdiyi faydalar baxımından şəhərin dünyaca məşhur olan termal bulaqları ilə rəqabət aparan kalabak suyunu dadaraq əldə etdiyiniz şəfanı iki qat artıra bilərsiniz. Həmçinin, ağ qızıl kimi tanınan dəniz köpüyü, Eskişəhər daşı, lülədaşı Türkiyənin tək emal edilə bilən lülədaşıdır. Radiasiya udma xüsusiyyəti ilə məşhur olan lülədaşından hazırlanan məmulatlar Eskişəhər sənətkarlarının dəzgahlarında şəhərin əl işi məhsulları ilə təbii, səmimi və ahəngdar bir bütövlük yaratmaqdadır. Heyvanlara xüsusi düşkünlüyünüz varsa, qeyd edək ki, Sivrihisar ətrafında yetişdirilən Eskişəhərdə ən çox bəyənilən çoban itləri arasında yer alan Akbaş itinin məmləkətidir..

Eskişəhər Türkiyəmizin ən modern şəhərlərindən biri olsa da, istiqanlı təbiəti ilə hər zaman diqqət çəkən, rahat otelləri ilə də sizə ən az evinizin rahatlığını tam təmin edən bir özəlliyə sahibdir.

Eskişəhər, qışda mərkəzində daha mülayim hava şəraiti olan, rayonlarında isə yayda daha sərin hava şəraiti ilə fərqlənir. Bundan başqa Lüks otellərdən apart otellərə, butik otellərdən hostellərə qədər büdcəniz və məkan zövqünüz daxilində ən ideal seçimi edə bilərsiniz. Təmiz, rahat məkan və mehriban komandası ilə..

Eskişəhərin sosial sənət mərkəzlərində sənətin hər növündən zövq ala bilərsiniz. Bu şəhərdə gəzməli yerlər arasında şəhərin məşhur muzeyləri ilə yanaşı, Xan Antik Şəhəri, Midas Anıtı, Odunpazarı Evləri və bir çox görməli yerlərində tarixə bir başqa pəncərədən səyahət etmək fürsəti əldə edə bilərsiniz. Digər tərəfdən Porsuk çayı – ( Eskişəhərə fərqli bir atmosfer qatan Porsuk çayında qayıqlarla səyahət edə bilərsiniz. İç Anadolunu əhatə edən bu çay turistlərin diqqətini çəkməkdədir. Ətrafdakı otellərdə yerləşmə ilə yanaşı, otellərin pəncərələrinin əksəriyyətində Porsuk çayına rahatlatıcı mənzərə açılır. Səhər yuxudan oyandığınızda önünüzdə möhtəşəm təbiət mənzərəsi ilə qarşı-qarşıya olacaqsınız) və Quş Cənnəti kimi təbii əraziləri ilə dünyaca məşhur olan şəhərdə tərtəmiz termal spalarda çox gözəl və keyifli zamanlar keçirə bilərsiniz.

Beləcə, yerli əhalisi ilə bərabər Avropa və Qafqazdan gələn mühacirlərin təsiri ilə bugünkü multikultural kimliyə çatan Eskişəhər həm də izah edə bilməyəcəyimiz zəngin bir süfrə mədəniyyətinə malikdir. Demək istərdim ki, tipik bir Anadolu şəhərindən çox fərqli bir atmosferə sahib olan Eskişəhər həftə sonlarınız üçün və uzun müddətli tətilləriniz üçün seçilə biləcək ən ideal yerlər sırasındadır.

Təbii ki, şəhərin populyarlığının artmasında Avropasayağı görkəminin böyük payı da var. Lakin bu vəziyyətdə Balkanlar və Krımdan gələn mühacirlərin şəhər mədəniyyətinə töhfələri də mühüm rol oynadığı görünür.

Eskişəhərin zəngin bir mətbəx mədəniyyəti var. Belə ki, məşhur şorba mədəniyyətini qeyd edə bilərik. Şorbanızdan sonra bükmə, kobet, cantik börəkləri dada bilərsiniz, sonra isə balaban kababı, kələm dolması, Şirniyyata can atırsınızsa, şəhərin unikal ləzzətlərindən biri olan met və ya nuqa halvasını tövsiyə edə bilərik.

Eskişəhər Böyükşəhər Bələdiyyəsi tərəfindən 9 Mart 2019-cu ildə inşa edilən Ulus abidəsi – Abidə İsmət İnönü küçəsində, Stansiya qovşağında yerləşir. Qəhrəman Türk millətinin ortaq dəyərlərini və istiqlal mübarizəsini simvolizə edən bu abidənin ətrafı bu gün məşhur meydan kimi xalqın görüşdüyü yerlər sırasındadır, çox zəngin bir əsər olan Ulus abidəsi Eskişəhərin simvolik strukturları arasında yer almaqdadır. Qeyd edim ki, İranlı heykəltəraş Afşin Esfandyari tərəfindən inşa edilən abidə Türkiyə üçün çox mənalı bir abidədir və Ulus abidəsinin zirvəsində Mustafa Kemal Paşa Atatürkün heykəli var.

Odunpazarı Müasir Muzeyi – OMM deyə adlanır..

OMM – Eskişəhərdən “Dünyaya AÇILAN YENİ NƏFƏS” – deyərdim.

Təxminən 4500 kvadratmetrlik sahəni əhatə edən Odunpazarı Müasir Muzeyi 2019-cu ildən ziyarətçilərin üzünə açıqdır. Muzeyin giriş mərtəbəsi kifayət qədər genişdir və ziyarət edə biləcəyiniz ümumilikdə 3 mərtəbə var. Qeyd edim ki, OMM yuxarı mərtəbələrə doğru dar strukturda layihələndirilib.
Belə ki, OMM muzeyi sizlərə müxtəlif sərgi sahələrində təsirli əsərlər təqdim edir.

Beləliklə, OMM-yə daxil olarkən biz, jurnalistləri qarşılayan Eskişəhər Mədəniyyət və Turizm Müdiri Şennur Azade xanım oldu. Şennur Azadə xanım Azadmedia.az-a verdiyi reportajda – “Eskişəhərdə açılan OMM muzeyi ilə bərabər, digər mədəniyyət və incəsənət mərkəzləri, heyranedici memarlıq strukturları, idman mərkəzləri, qastronomik tədbirlər, festivallar və daha bir çox alternativlərlə şəhərin tamamilə fərqli bir ruh aldığını və turistlər üçün təqdim edilən çox yönlü imkanların cazibə mərkəzinə çevrildiyini qeyd etdi. İnanıram ki, Eskişəhərin mövcud cazibə nöqtələri ilə yanaşı, yeni ideyalar da yaratmalıyıq və düşünürəm ki, eskişəhərlilərlə birlikdə bu mövzuda dünya səviyyəsində yeni addımlar ata bilmişik və bilirik” və həmçinin Eskişəhər üçün fərqli və qabaqcıl layihələrin əhəmiyyətini vurğuladı.

Sonda isə Şennur Azadə xanım dünyanın müxtəlif ölkələrindən gələn jurnalistlərə və 1453 Kral Medianın Azərbaycan əməkdaşlığı – Azadmedia.az-ı təmsil edən Jurnalist, politoloq Ülkər Piriyevaya Eskişəhər və OMM ilə bağlı materialları hədiyyə olaraq təqdim etdi. Jurnalistlər öz növbəsində xoş xatirə hədiyyəsi üçün minnəttarlıqlarını bildirdilər.

Xüsusilə diqqətçəkən əsərlər sırasında, Dünya şöhrətli bambuk sənəti ustası
IV Çikkunsai Tanabe tərəfindən “Pələng bambuk”dan hazırlanmış olan əsər muzeyin ən gözdə və sevimli əsərlərindən biridir.

Muzeyin memarlıq qrupunun yaradıcıları olan KKAA və OMM-nin ekoloji cəhətdən təmiz bir şəkildə işlərini davam etdirməsindən ilhamlandığını bildirən Ç. Tanabe öz əsərində təbiətdəki dörd ünsürdən (od, hava, su, torpaq) və insandan mövzu kimi istifadə edib.

Tanabe belə vurğulayıb – “Mən quraşdırmanın yerləşdiyi məkanı “boşluq” kimi qəbul edirəm və biz insanlar məkanı başqa elementlərlə doldururuq. Bu elementlər daimi hərəkət vəziyyətindədirlər və bir-birinə qarışaraq yuxarıya doğru qalxırlar. Beşinci mövzu əslində Eskişəhərdə tanış olduğum insanlar, onlarla münasibətlərim və onların bir araya gətirdiyi qarşılıqlı əlaqədir. Bu qarşılıqlı əlaqənin və dostluğun Eskişəhərdə yayılmasına və daxil edilməsinə diqqət yetirdim. Eynilə, mən də təsəvvür edirəm ki, Eskişəhərdə OMM açılandan sonra buradakı həyat bütün şəhərə yayılacaqdır”.

Bəli, “Dinamik, Orijinal və Polifonik” Yeni Platforma: Odunpazarı Müasir Muzeyi.. – OMM

Eyni zamanda daimi kolleksiyalarda Jaume Plansa, Canan Tolon, Erdağ Aksel, Erol Akyavaş kimi rəssamların da əsərləri yer almaqdadır, qısacası, müasir incəsənətlə maraqlananlar üçün məşhur bir muzey olan – OMM.

Həmçinin, Türkiyənin və dünyanın müxtəlif yerlərindən müasir incəsənət mövzulu əsərlərini görə biləcəyiniz muzey, ilk növbədə taxta quruluşu və Yapon memarlığı ilə diqqət çəkir.

Muzeydə yeni media hərəkatının nümunələrinə, xüsusən də rəsm və heykəltəraşlıq əsərlərinə rast gəlmək mümkündür. Binada hər cür şərait mövcuddur, beləliklə, əgər sizlər modern incəsənət mövzusu və ya nümunələri ilə maraqlanırsınızsa, Eskişəhərdəki OMM-yi mütləq ziyarət etməlisiniz.

Türkiyədə istehsal olunan dörd Devrim avtomobilindən birini Eskişəhərdə görmək mümkündür.

Mülki və hərbi döyüş təyyarələrinin sərgiləndiyi Eskişəhər Aviasiya Muzeyi şəhərin ən maraqlı muzey nümunələri arasındadır.

Anadolunun ən böyük taxta dirəkli məscidi – Anadoluda çox olmayan taxta dirəkli və taxta tavanlı məscidlərin ən əhəmiyyətli nümayəndələrindən biri olan Sivrihisar Ulu Məscidi 2016-cı ildən bəri YUNESKO-nun Dünya Mədəni İrsi müvəqqəti Siyahısına daxil edilmişdir. Məscid 1274-cü ildə Mövlana Cəlaləddin Ruminin davamçılarından biri tərəfindən tikilmişdir. Ehtimal ki, 1485 kvadratmetr sahədə qurulan Sivrihisar Ulu Məscidinin damını 67 taxta dirək daşıyır. Bu sütunlardan altısı motivlərlə bəzədilib. Sütunların yuxarı hissələri rozetlər, palmetlər, həndəsi və nəbati motivlərlə bəzədilmişdir. Dörd giriş qapısı olan məscidin minarəsinin kitabəsində 1409-cu ildə Osmanın oğlu Hacı Həbib tərəfindən tikildiyi yazılıb. Sivrihisar xalçaçılığının gözəl nümunələrini məsciddə də görmək olar.

XIII əsrdə yaşamış yumor qəhrəmanı Nəsrəddin Hocanın Sivrihisarın Hortu kəndində doğulduğu qeyd edilir. Əslində, sivrihisarlılar da həmyerlilərini tanıtmaqdan qürur duyurlar.

Zövqlə, yorulmadan gəzə biləcəyiniz yerlər sırasında – Odunpazarı evləri

Odunpazarının ənənəvi evləri turistik baxımdan çox təsir edici bir atmosfer yaratmaqdadır. Onu da deyim ki, şəhərin ilk məskəni kimi tanınan və tarixi eramızdan əvvəl 1400-cü ilə qədər uzanan Odunpazarıda Kurşunlu Məscidi və Külliyesi, Lülədaşı Muzeyi, Atlıxan Əl sənətləri bazarı, Bal şamı Heykəllər Muzeyi, Müasir Şüşə İncəsənət Muzeyi, Osmanlı Evi kimi yerləri də ziyarət edə bilərsiniz.

Bəli, başdan ayağa tarix qoxuyan şəhərin nostalji mərkəzi olan Odunpazarı Eskişəhərdə gəzməli yerlər siyahısında birinci yeri tutmaqdadır.

Bura, turistlər üçün çox cəlbedici bir yerdir. Evləri, küçələri, muzeyləri, insanları və ümumi tarixi toxunuşuyla.

Odunpazarı UNESCO-nun Ümumdünya İrs Siyahısına daxil olan, mahiyyətini qoruyub saxlayan, eyni zamanda turistik baxımdan da böyük diqqət çəkən yerlərdən biridir. Şəhərin cənub təpələrində tikilmiş bu tarixi bölgədə Osmanlı memarlığını əks etdirən evlər böyük diqqət çəkir. Həmçinin Odunpazarıya səciyyəvi xüsusiyyət qazandıran və Osmanlı memarlığını əsrlər əvvəlindən günümüzə qədər daşıyan tarixi evlər bugünə qədər çox yaxşı qorunub saxlanılmışdır.

Qeyd edək ki, Odunpazarında pəncərəli, rəngli və bir-birinə bitişik evlər də dövlətin məsul qurumları tərəfindən vaxtaşırı bərpa olunur.

Önəmlisi burasıdır ki, təmirli evlərin bəzilərində hələ də yaşayanlar var, lakin əksəriyyəti restoran, kafe, muzey və mağaza kimi istifadə olunmaqla bərabər dar küçələrdə 2-3 mərtəbəli evlər yan-yana düzülməkdədir.

Atlıxan Əl Sənətləri Çarşısı – XIX əsrin ortalarında yaşayış yeri olaraq inşa edilən Atlıxan Əl Sənətləri Çarşısı zamanla bölgə əhalisinin ictimai, siyasi və iqtisadi mərkəzlərindən birinə çevrilmişdir. XX əsrin ikinci yarısından sonra funksiyasını itirən bina 2006-cı ildə bələdiyyə tərəfindən orijinal arxitekturasına uyğun olaraq yenidən inşa edilmişdir. 768 metr ərazidə qurulan mehmanxana iki mərtəbəlidir və 30-a yaxın atelyedən ibarətdir, sexlərdə ənənəvi əl işlərinin istehsalı, nümayişi və satışı həyata keçirilir. Eskişəhər əl işləri baxımından çox inkişaf etmiş və gözəl sənətkarlıq məhsulları ilə dolu bir şəhərdir.

Eskişəhərdə eşq şəhəri imicini yaratmaq məqsədilə 2010-cu ildə açılan “Şehri Aşk” adası Porsuk çayı üzərində qurulmuş süni bir adadır. Açılışına bir çox yerli və xarici məşhurun qatıldığı Şehri Aşk adası eskişəhərlilər tərəfindən coşğu ilə qarşılanıb. Bütün şəhər sevgi motivləri ilə bəzədilib. Hətta Eskişəhərdə yaşadığı güman edilən Yunus Əmrənin sevgidən bəhs edən misralarına da yer verilib. Dinc vaxtlar keçirmək istəyirsinizsə, ŞehriAşk adasını istənilən gün və istənilən vaxt ziyarət edə bilərsiniz.

Özünəməxsus təbiət mənzərəsi və ürəkaçan yaşıllığı ilə hər kəsi özünə valeh etməyi bacaran Gönül dağı.. Beləliklə, kiçik torpaqlarda böyük xəyallar quranlar silsiləsi.. Sizi özünə çəkəcək “Gönül dağı” hekayəsi..
Bəli, çöldə bir Anadolu nağılı.. İllərdir danışılan əfsanələrin, unudulmaz sevgilərin, kiçik torpaqlarda böyük arzular böyüdən uşaqların unudulmaz hekayəsi..

Qeyd edim ki, Eskişəhər bir vilayətdir və Türkiyə Cumhuriyyətinin ən çox əhalisi olan iyirmi beşinci şəhəridir. Bundan əlavə, əhalisinin sayına görə Ankara, Konya və Kayseridən sonra İç Anadolu bölgəsinin 4-cü böyük vilayətidir. 1993-cü ildə qəbul edilən qanunla Böyükşəhər Bələdiyyəsi oldu. Əhalisi 898,369 nəfərdir. Beləliklə, burada təhsil almaq istəyi olanlar üçün hər şeyi ilə əlverişlidir. Porsuk çayının ortasından keçən şəhər, Osmanqazi Universiteti, Eskişəhər Texniki Universiteti və Anadolu Universitetinin olması səbəbindən “tələbə şəhəri” kimi də gözəl görüntü bəxş edir.

Eskişəhər ilk çağlardan Səlcuqlu dönəminə, Osmanlı dönəmindən Cumhuriyyət dönəminə qədər tarixi izlər daşıyır. Keçmişini sabahlara daşıyan və hər daiç müasirləşən şəhər Eskişəhər..

Qeyd: Türkiyə Cumhuriyyəti Mədəniyyət və Turizm naziri Mehmet Nuri Ersoy,
Eskişəhər Valisi Erol Ayyıldız,

Eskişəhər Böyükşəhər Bələdiyə başqanı Yılmaz Büyükerşen, Eskişəhər İl Mədəniyyət və Turizm Müdiri Şennur Azade xanıma, “Go Turkiye” rəhbərliyinə – media əlaqələr şöbəsi Tarık Erenə, Tur rəhbəri Seçkin Ercana təşəkkürlərimizlə..

Ülker Piriyeva – Azerbaycan

1453 Kral Media xəbər verir ki, Türkiyə Cumhuriyyəti Mədəniyyət və Turizm nazirliyinin dəvəti ilə “Go Turkiye” proqramı çərçivəsində Türkiyənin turizm potensialının tanıdılması məqsədilə dünyanın beş ölkəsindən olan nüfuzlu media şirkətlərinin nümayəndələri İstanbulda görüşüb.

Belə ki, “Go Türkiye” proqramında Azərbaycanı Ülkər Piriyeva-Azadmedia.az, Elnarə Kərimova, Qırğızıstanı Aziza Satimbekova, Qazaxıstanı Dauetbai Nurmakhnov, Nuradin Rakai, Bosniya-Hersoqovinanı Senad Omerasevic və Rumıniyanı Luminita Nimerenco, Constantin Plamadeala təmsil edirlər.

Nəzərinizə çatdıraq ki, “Go Turkiye” turu çərçivəsində İstanbul, Eskişehir, Afyon və Kütahya şəhərlərinin turizm potensialının tanıdılması nəzərdə tutulub və tur 6-11 oktyabr tarixlərini əhatə edir.

Dünyanın beş ölkəsindən olan Jurnalistlər İstanbul daxil olmaqla, Eskişehirdə -Sivrihisar Ulu Camii, Odunpazarı və muzeylər, Afyonda – Ulu Camii və Mevlihane, UNESCO listesinde olan Ulu Camii, GastroAfyon – Gastronomiya festivalı, Kütahyada – Zeus tapınağı – Teatr və Muzey, Kütahya Arxeologiya muzeyi, Ulu Camii, Küthya Mədəniyyət və İncəsənət evi və başqa yerləri ziyarət ediblər.

Bəli, Türkiyə Cumhuriyyəti sizləri milyonlarla ulduzun altında təbiətin qoynunda unudulmaz səyahətə dəvət edir. 1453 Kral Media dəyərli oxucularına təqdim edir – Türkiyənin Qlobal Turizm Tanıtım Platforması – GoTurkiye.com
Türkiyənin Qlobal Turizm Tanıtım Platforması GoTurkiye.com Türkiyə haqqında məlumat almaq və səyahətlərini planlaşdırmaq istəyən bütün istifadəçilərə ölkənin mədəniyyət və turizm dəyərlərini bir dam altında təqdim edir.

Belə ki, Türkiyə Cumhuriyyəti Mədəniyyət və Turizm Nazirliyi və Türkiyə Turizm Tanıtma və İnkişaf Agentliyi – TGA tərəfindən ən son texnologiya və müasir dizayn tendensiyalarına uyğun olaraq hazırlanan bu platforma ilə yüksək səviyyəli istifadəçi təcrübəsi hədəflənib ki, bunun vasitəsilə də istifadəçilər Türkiyə ilə bağlı əhatəli məzmundan daha çox faydalanmaqdadırlar.